【攝影攻略】全片幅潮流下的異軍FUJIFILM

「做咩用富士？都唔係FULLFRAME。」
「萬幾蚊買部APS-C，我覺得唔值得。」
「直上A7啦﹗價錢都唔係話差好多。」
「用富士機既都係扮文青姐。」

作為一個富士相機既愛好者，午夜夢迴，手心冒汗，都會幻聽到呢啲對白…咁講當然係誇張左，但我相信應該有唔少富士同好聽過上面呢啲說話。

的確，富士相機如果講對焦速度不如M3/4既無反，講畫質不及全片幅既A7系列或者高階單反，講輕便又唔係真係好輕便。唯一唔會被否定既係，富士相機影出黎既顏色係最順眼討好，直接出相唔使執都唔失禮。謎之聲：「今時今日影得相既，執下相係基本啦，呢個算咩優勢？」直到現時為止，富士都仍然無發表全片幅相機既計劃。APSC係全片幅既潮流底下，到底有咩吸引我地呢啲愛好者既地方呢？

FUJIFILM 相機用家分享全片幅潮流下的異軍

數數手指，自己影相既年資尚淺，大概係4年左右時間，用過既相機由NIKON V1（唔好再問我點解會買佢，我個陣真係乜都唔識架…），FUJIFILM x20，Xe1，Xt1，到宜家係Xpro2，除左間中會問朋友借其他相機試玩下之外，基本上9成時間都係用緊富士既相機。講到佢好似咁唔特別，咁唔突出，點解我仍然會選擇呢個廠家，呢個品牌？

係愛呀哈里！但淨係愛當然唔夠，而係因為我覺得富士相機成個系統都好平衡，好符合我個人既攝影習慣。而富士相機隨住時間，發展愈來愈成熟，更見廠家功架。

現今市面上富士相機既主要路線有4條，全部都配備APS-C感光元件：

1. X100系列：隨身機，配備35MM等效f2光圈鏡頭，畫質細緻，惟近拍成像較鬆散。復古機身設計，近年復古相機風可以話係由佢帶起。隨身機尚有今年初推出的X70，但因為未知會否推出後繼機而不作系列論。

2. XA系列：入門無反，主打普通用家。可反Mon自拍，輕身，滿足一般普通用家。可配合富士Xmount既所有鏡頭。有WIFI功能可以即時傳送相片，方便用家隨時分享。

3. XPRO/XE系列：XPRO1係富士2012年推，X mount第一個model。採用旁軸機身設計，配備混合式光學觀景器，以畫質同色彩見稱，唔會輸畀市面上專業單反。4年後XPRO2，改善左對焦速度，使用最新既處理器同感光元件，畫質更強，兼備防塵防水滴機身，係富士市面上最高階既產品之一。XE系列係XPRO系列既簡化版，放棄左混合式光學觀景器而改用電子觀景器。現發展到XE2S，採用與XT1一樣的感光元件，處理器，以及XT10一樣既對焦系統。另市面上仍有已停產的XE2，採用與XT1一樣的感光元件，處理器，但對焦稍慢。

4. XT系列：XT系列主打專業用家，防水滴防塵機身，反Mon，可外加直倒延長使用時間，亦方便用家使用較大型的鏡頭如XF16-55，XF50-140，XF100-400等。採用超大電子觀景器，如臨實景。最新Model為XT2，使用最新既處理器同感光元件，另外加強拍攝功能，可拍攝4K影片，配合新設計直例可加快連拍及加長拍攝時間，向專業更進一步。至於XT10係XT1既簡化版，除EVF縮細，無直倒配合，機身重量減輕外，與XT1既功能大致上一樣。

FUJIFILM 最吸引的地方：平衡

其實我係上文講既平衡係咩呢？就我用幾部機既經驗，係重量適中，對焦速度係接受範圍之內，畫質成色比起大部分單反更係有過之而無不及。無論日常、人像、街拍、產品攝影等等，基本上滿足大部分拍攝需要，惟獨因為對焦同追焦能力稍弱，係拍攝運動、動物方面比較弱。但如果要我為左畫質要去用單反，我應該無心情每日帶相機係身去到邊影到邊；如果要我為左對焦能力去買M3/4等對焦較快又輕便既相機，我又唔會捨得富士相機既畫質同色彩。

個人最鍾意既係，富士相機高階Model仍然保留用實體鍵去設定相機。舉例來說，大部分情況下你可以係未開機既情況下已經可以調整光圈、快門、ISO、曝光補償等設定（雖然亦因為咁，當我拎起其他相機時都比較難適應…），更令人有享受攝影既感覺。

所以你問我，點解用一筆可以A7、高階單反既價錢去買手上既XPRO2，我會認為用富士機既體驗係用其他廠商既相機畀唔到我，愛係超越規格。

相片會說話，以下是少少FUJIFILM相片分享。