Article

我夠膽講,IT 記者一定係新聞界最溫馴既動物

我夠膽講,IT 記者一定係新聞界最溫馴既動物

作為記者,一個星期幾單 Event 通常都少不免,不過作為 IT/副刊記者,其實心底裡面都幾怕遇到某啲版面既同行,一係娛樂、二係港聞。有人話:大家都係做野姐,點解要怕佢地?咁就要報紙年代既分版講起啦。

IT 記者係新聞界最溫馴既動物

喺香港媒體界,各個版面其實就好似一條食物鏈咁,用鬥獸棋個分級去形容既話,港聞就係大象,娛樂就係獅子,而我地 IT 版…唔…又未到老鼠咁低層次既,但應該同啲貓貓狗狗差無幾。冇計啦,最賣紙既通常都係呢兩版,即使進入網絡年代,佢地既地位依然都係冇變過。

同港聞版記者既交流其實冇咩既,只不過佢地為左搶頭條影相有時係搏命左少少咁。記得當年小弟入行冇幾耐,撞正 IFC Apple Store 開幕,無無聊聊走左去隔離 Starbucks 通頂,好好彩霸到個頭位,以為見證到 Apple Store 開門一幕好威威咁啦。但係將近開門之際,後面殺氣越來越重,越黎越多唔識既行家,一堆單反、一堆大 Cam咁排哂陣-嗰次係我同港聞行家第一次同場。

當時 Apple 只係圍左一條 5~6 個人身位闊既路,後面班行家都食過下夜粥架,招呼都唔打,幾支 Cam 就隊落我個頭度,當係城門咁撞;撞左幾次,喂,個位我通頂捱番黎,燥燥地咪掉轉頭啤佢地。結果同某個行家 Eye Contact 左,唔望尤自可,一望就知賴野,佢嗰股霸氣當堂令我縮一縮。我都未回神姐,佢就好串咁問:「你邊度架?」(冇吹水,真係咁問)。咁冇計啦,咪 Show 張卡片大家切磋下囉。點知佢一攞左我張卡片,見到我係網站,仲要係科技嗰隻,佢直頭收起左佢所有既感情,「哦…」然後就再冇任何交流啦,到幾年後既而家,我都仲未知道佢係邊間做。

嗰一刻,大概就同一隻大象見到一隻貓…呀唔係…可能係一隻蟻行過冇咩分別。

咁不過講番轉頭,又唔係個個港聞記者都咁冇禮貌既,又可能係自 Apple Store 之後,都好少科技野同頭版有咩關聯,所以遇到既港聞記者都冇咁緊張、有時仲有說有笑添。

好,「大象」就講到呢度,但其實比起港聞版呢隻「大象」,我更怕遇到「獅子」 - 娛記,究竟點解?留待下回再講。

作者/Aaron Choi
前手機網站編輯,現繼續在在科技、生活層面體驗更多、分享更多。
有機男 Aaron Choi:https://www.facebook.com/techyaaron

About Author

前手機網站編輯,現繼續在在科技、生活層面體驗更多、分享更多。 有機男 Aaron Choi:https://www.facebook.com/techyaaron