By Something Wong （我們都是喜愛閱讀的）
續上文：https://menlogic.hk/somethingwong-alan196
我和Catherine終於要結婚了。
戒指買了，婚求過了，仲見埋雙方父母，老實說，我最擔心的都已經搞店了，因為之前做過朋友的兄弟，結婚呢D野，其實都係搞Event，而我同Catherine，真係無乜Event未搞過。
最意想不到的，係我在周大碌求婚單野比人拍了片，仲放埋上網。
依家成公司都在恭喜我。
「你就好啦！」賤精Raymond一邊將我求婚的影片Show比我睇，邊說。
「唔怪知佢咁多年都唔多采我，原來有你做我情敵！」他說。
「喂先生你好似有老婆仔女的。」我冷冷地提醒他一下。
賤精Raymond這個人，口賤起上黎，連老婆姓乜都唔記得。
或者咁講，連自己有老婆都唔記得。
「咁之前成日接Catherine收工個鬼妹．．．」賤精Raymond樣衰衰地問道。
「係咪玩三人行？！」
我無理到佢咁多，直接拍拍佢膊頭，拿住我那杯剛沖好的咖啡，行開，開會。
我地的每周大會，係每個team member向我和Pam姐匯報的會議，基本上，我隊Team已經發展到大家無乜大問題要匯報，除非係搞唔店的事之外。
到了會議尾聲，AOB (any other business) 的部份，Pam主動開口。
「我呢度有個Issue．．．」她說。「我地個珠寶客周賓賓想拍一條好似先排佢個Competitor周大碌擺上網並 Viral左那條片。」
我飲飲下杯咖啡差點噴左出黎。
「但係一睇周大碌條片，入面的男女主角竟然係我地自己同事．．．」Pam姐一邊忍唔住一邊笑著說。
「Alan你度一度點樣可以超越到自己。」Pam姐好明顯係在潤我。
因為我地同周賓賓一個月前就已經完左Contract，而且呢個客亦唔係我地條Team負責的，係我地子公司其他Team跟開，所以我一聽就知道Pam姐的醉翁之意。
「話時話，周大碌都算反應快，個店員咁岩影完條片，話咁快就剪好放了在自己的YouTube channel裡面！」Suki一邊在projector開條片出來一邊正經地說。
然後，成team人一邊睇一邊笑到停唔到。
除左Suki。
「阿妹，我講笑咋，個客無咁要求。」Pam姐睇完條片笑說。
「好啦，大家無事就出返去做野啦，等你派帖呀！」Pam姐把電腦蓋上，一支箭咁出了會議室。
成Team女同事全部望住我。
「大家睇下下午茶食乜，陣間我請！」我引開話題。
「大佬，不如請食翅丫！」Vivian忽然爆了一句出來。
我立即啤住佢。
「碗．．．碗仔翅．．．」她口窒窒地笑說。
呢個女，越來越牙尖嘴利，可能佢同Catherine係好姊妹，所以見我就黎做Catherine老公，膽也大起上來了。
「收聲啦．．．」波波在旁邊細細聲的說。
經過上次揭露阿邦的衰野之後，波波已經好似無左件事咁，大家在公司裡面正正常常，開開心心。
「不過大佬你千祈唔好叫賤賤做你伴郎呀！佢講到明唔鍾意架！」Vivian說的佢，當然係Catherine。
而賤賤，係賤精Raymond在公司個朵，女同事們算比面，之前Pam姐叫我地唔好成日幫其他Team同事改埋曬D難聽的花名，成班女同事就幫Raymond改了個「比較」可愛的。
「乜阿賤咁真係差嗎？」我問道。
「你會找個worst man 來做你的best man嗎？」Suki一句講中重點。
話時話，我真係無想過伴郎同兄弟呢單野。
「其實．．．今朝Catherine問我可唔可以做伴娘．．．」Vivian不好意思地說。
我忽然感到有少少壓力。
「好啦，出去做野，傷心野唔講住！」我笑說，之後一支箭的飛奔出會議室。
班PK女同事下午茶真係人人叫碗仔翅再加幾盒燒賣炸雞翼．．．
「如果叫埋隻乳豬係咪唔使請你來飲？」我問正在大啖大啖地扯雞翼食翅的同事們道。
見就快收工，Catherine去做Facial，我正愁自己一個去邊食晚飯，忽然Whatsapp響起。
「放工未？樓下接你！」來者，蚊蚊是也。
正好，反正今日在公司都係被人拿來做話題，不如早收工。
「海乜街等！最大那架車！」蚊蚊說。
落到樓下，行到海乜街，就見到一架Rolls-Royce Phantom停了在路邊。
今日蚊蚊唔自己開車，用了司機。
「你點知你架車係成條街最大那架．．．．．．」我打開門探頭入去笑說。
但話未說完，蚊蚊已經拉了我入車。
旁邊坐著的，是琪琪和Riona。
「你個衰人！」蚊蚊二話不說便一拳打過來。我記得她學過詠春，一拳之後開始變了很多拳日字衝拳，下下打到入心口，我開始頂唔得幾多下。
「痛痛痛痛痛！」我叫道，琪琪和Riona這時開始捉實蚊蚊，停止了她的攻擊。
「做乜結婚唔同我商量！！」蚊蚊的眼淚開始標出來了。
「我．．．我．．．」看見蚊蚊在哭，想把她抱在懷裡，但一磅她，這反而讓她哭得更厲害。
「Alan先生，你這是認真的嗎？」Riona雖然聽起上來語氣有點生氣，但仍保持她的大方得體。
是的，我說過要照顧Riona的，那現在．．．
「是的，我很清楚我在做甚麼，要做甚麼．．．」我說道。
「很對不起．．．」我認真地道歉道。
「你咪以為就咁就算呀！」琪琪接過手來抱著正在刷眼淚的蚊蚊說道。
「你結婚都關我地事的！」蚊蚊說。
「請問．．．點關事？！」我問道。
「準備成點？」蚊蚊問。
「未準備．．．」我說。
「簽紙擺酒場地？」琪琪問。
「未找．．．」我說。
「兄弟姊妹團呢？」琪琪繼續問。
「姊妹團好似佢正在籌備緊，而我．．．無乜心水。」我說。
「咁得，開車！」蚊蚊向司機說。
之後，我被帶到一間只招待女生的高級女士Spa。
「你做個熱石按摩先，電話交比我。」蚊蚊說。
說時遲那時快，我便被Spa的大波女職員帶了入房。
但是這間Spa係超級正經的．．．
這個Spa，一做便兩個鐘頭。當我行返出來時，她們三個已經坐在一邊飲緊花茶了。
「已經幫你搞店場地同兄弟了，其餘的交比我地Event team做就得。」蚊蚊拿著我的電話說。
「場地三揀一，兄弟無得揀。」琪琪笑說。桌面上，列印了三份場地的資料。
「咁．．．你地算唔算騎劫了我個婚禮？」我巧秒地問道。
「你騎劫了我地的青春咁又點計？」蚊蚊語氣變重了。「重有Riona呢？」
說到這，我無言以對。
「唔緊要，大家做兄弟！」Riona忽然用很標準的廣東話說。
估唔到，來了香港幾年，她的廣東話進步得咁快。
但呢句說話點解？
當我用一個好疑惑的眼光望住佢兩個的時候，琪琪遞了張紙過來，上面都係一些名字。
「這個是兄弟團名單。」蚊蚊說。
我看了一看，更加疑惑。
「全部都係女仔名．．．」我說。
「我地都唔想，你部電話通訊軟件入面會聯絡的人，除左客戶，你老豆你舅父表哥表弟之外，全部都係女仔．．．你係咪無乜男性朋友架？」琪琪問道。
「我同事Raymond得唔得？」我問道。
「那天我在你公司樓下撞到那個？Come on... 」琪琪說。
「你見過一眼咋喎．．．」我說。
「但印象深刻。」她說。
看來，賤精Raymond真係一表人材，廢物界裡面。
「Anyway，兄弟團我地會繼續聯絡架啦，佢地好多都已經應承左。」蚊蚊說。
我見到，蚊蚊用我電話聯絡了一些我最常找的人，問他們能否做我婚禮的兄弟。
「你拿呢幾份場地資料返去同你個老婆仔研究下啦，場地都係我那些Uncle話事的。」蚊蚊續說。「結婚既野我地幫手搞，你定好日子就得。」
就係咁，我那個晚上同Catherine一齊研究那些場地。
「都係有錢人去的私人會所來的哦．．．」我一邊睇一邊驚訝道。
「呢度真係得？」Catherine也很驚喜。
「我個伴郎話OK，以他的人脈人面，一定得。」蚊蚊和她爸爸，相信唔使我多講。
「話時話．．．Raymond做伴郎呢單野．．．」我出了個試探步。
「絕對唔得，否則反面！全世界乜人都得係佢一定No！」Catherine決絕地說。
可能在公司隻賤精成一做埋曬D衰格野，所以Catherine以及其他女同事都對他好反感。
這邊廂，我和Catherine在弄衣飾的東西，那邊廂，兄弟團已經把其他事項處理得井井有條。
一個月後，我地已經約好了兄弟姊妹們去試食酒席菜式。
臨出發前，蚊蚊叮囑千祈要空肚參加。
蚊蚊的理由好簡單，一般來說，婚宴當日兄弟姊姊新郎新娘都忙到食唔到野，今日的試菜其實係滿滿的一圍餐單，有埋酒水，蚊蚊老豆Richard埋單。
當兄弟姊妹們都到齊後，個氣氛有點Odd。原因，你睇下下面個兄弟姊妹List就知：
Catherine姊妹團：
嘉嘉（伴娘）
同事Vivian
朋友Jennifer（公司同一棟寫字樓那個大波妹）
小學同學A
小學同學B
中學同學C
中學同學D
中學同學E
Alan哥兄弟團：
蚊蚊(伴郎)
琪琪
Riona（前日本動作愛情片女星）
阿欣（在醫院救過她一命）
Amy （長跑女護士）
Stella（我初戀）
Rachel（我髮型師）
Summer（Jennifer表妹，混血兒，開舖賣衫）
我的兄弟團，在蚊蚊的精心設計下，「兄弟團」各人都穿了貼身西裝和把頭髮紮起，令到我身邊無啦啦坐了8個漂亮的帥女孩。
而當大家坐埋兩的時候，情況就來了。
「表妹！」Jennifer驚喜地叫道。
「表姐．．．」Summer有點意外。
「乜你做男家那邊的兄弟？！」Jennifer問。
「呀！表姐乜你唔係Alan哥哥的炮友嗎？」Summer說。
「朋友，係朋友，我更正！」我連忙說，Summer呢個鬼妹仔成日讀錯中文字．．．
Catherine呢個時候個樣已經有小小激親。因為Jennifer亦都係佢個「貼身」好朋友。
「乜大佬你個兄弟團全部都係女仔．．．」Vivian說。
「新娘的姊妹團都一樣全部係女仔丫。」蚊蚊回答道。
「．．．但你地真係好有型呀！」Vivian兜返，但她這樣說對整個場面其實真係無乜幫助。
「係呀，你知唔知原來Rachel同Summer都好識得Set頭，簡簡單單就將我地成個Look提升到另一個型女程度！」琪琪說。
只見Catherine同嘉嘉兩個無聲出。
「介紹下我身邊呢位Best man，好兄弟，蚊蚊！」我說。嘉嘉同Catherine勉為其難地點了點頭，而Catherine那5個同學姊妹，在大家面前更加係平庸到接近透明。
而阿欣、Amy同Stella則以一個有少少反白眼的態度去同Catherine交流。
畢竟她們很清楚知道Catherine過去如何令我變成一具無靈魂的軀殼。
「呢位小姐好似好面善．．．」中學同學C對著Riona說。
「可能你見過我小時候做模特兒的照片吧。」Riona說。
接著便在電話中找出一些之前她賣啤酒廣告的照片出來。
她告訴過我，那些照片都是假的，全部移花接木，用來應付上述被認出的情況。
但是Catherine應該認得出Riona，因為佢以前同我有睇過Riona的一些大作。
其實，兄弟團咁既陣容，蚊蚊係咪玩野？真係結得成婚都成問題。
我捉著Catherine有點微震的手，令她不要那麼激動。
不過話時話，蚊蚊在搞Event方面的確係有一手，所有Proposal的待辦事項都交待得清清楚楚。主要原因，琪琪話返比我聽，係因為佢找了間比wedding planner更專業的活動公司來處理背後的工作。
「拿，日期就大致呢幾日呢幾日，Big day當日會有車來接你地去會場，大家只要負責校好鬧鐘識得起身就OK。」琪琪說。
「Big day前那個weekend，Alan哥會有個Bachelor's party，希望Catherine你唔好介意。」蚊蚊說。「Catherine的姊妹團亦可以搞一個Bachelorette Party，我在澳門剛好有幾張五星級酒店的高級行政套房的免費Coupon，包埋自助餐同天天做Spa的，反正之前公司春茗買來抽獎送唔曬，唔用就快過期，唔嫌棄的話你地可以拿去隨便玩。」
聽到呢度，Catherine的幾個同學尖叫了起來。
「Bachelor's Party？！成個Weekend？！」我趁她們開心到亂叫的時候細細聲問身邊的蚊蚊。
「Trust me...」她在我耳邊輕輕的說。
老實講，她不說這句話我反而還安心一點點．．．
（待續）
－－－－－－－－－－－－
作者Facebook專頁，喜歡入去Like一Like：
https://www.facebook.com/somethingwong
