Honda Freed剛賣街，香港搞緊預售，車價$246,880。如果你問我抵唔抵買，我可以直接搭你，如果你真係想買呢部車，不妨再等下佢減價。點解？我早排去咗轉日本試駕，發現呢部車，有好明顯嘅一個問題，就係其實毫無突出賣點。
Honda Freed新版外形依舊
論外形，官方指是全新車款，車身設計亦係全新設計，不過，其實兩者分別不大，可以話近乎一模一樣。雖然睇得出Honda好想Freed個造型後生啲，但好可惜，唔太成功，依然都幾老土，走傳統路線，唔似得Toyota Sienta咁咁破格。雖然Sienta嘅破格亦令佢換嚟兩極化嘅評價，但至少攞到話題先。
Freed被稱為Sienta嘅勁敵，兩者都係主打入門級七人MPV，以實用取勝，雙電敞門、低地台，「2+3+2」嘅七人座位佈局，同內櫳空間增闊，有16處收納空間，以及用料上乘咗好多，呢啲都係新Freed嘅賣點，之但係，人哋Sienta都係賣緊呢啲，都只係賣$209,300起。當然，你可以話Sienta早賣咁多，車價再調整再平啲好正常啫。無錯，我唔否認，但面對咁強大嘅勁敵，Freed所訂嘅車價受到日圓升值影響，自然就輸蝕好多。
再講性能，睇副偈1,496cc 直四i-VTEC、131匹、155Nm同用CVT，擺明係無力慳油格，油耗數值19.4 km/L，大約$0.7嘅油費，都預咗要有呢個標準先好同人講嘢。5個大人，近乎Full loading行高速，行小斜路，踩第一下油門，無力，轉數聲大得驚人，架車先有力去。喺高速公路，要快，要爬頭，近乎無咩可能，你只聲到轉數聲，不如死咗條心，慢慢揸，享受下佢個懸掛好過。無錯，個懸掛調校得唔錯，軟硬得宜，而且架車重心低咗啲，過彎都穩定，車身搖晃情況都無乜，我確實要比個讚佢。信我，因為我試咗成日。
評價，我只能話中規中舉，就好似考試攞到60分左右，唔突出，但唔太差。事實上，佢實在無咩值得令人留下深刻印象嘅地方。如果你話佢有StepWGN嘅尾門設計都好吖，可惜Honda話要控制成本之餘，StepWGN亦用唔到喺Freed到，而且佢哋係想整第二部StepWGN出嚟喎。
作者／拍車男
真實車評，減廢話減無謂形容，正就讚、渣就鬧，無面比，只求為大眾看見真實一面，買得放心。
拍車男：https://www.facebook.com/autoguyzrelation
