知名本地模特兒Candy Wong，由模特兒轉職空中服務員，女神樣貌依舊。除了拍照以外，亦處女下海成為《男士通信》定期專欄作者之一。她的一切所知所聞所見，讓她慢慢告訴各位男士。
由己及人
要一個禮拜寫一篇原來都真係唔容易，一世人流流長，總會有特別忙嘅日子；聽日飛吉隆坡，啱啱先執好行李摺好圍裙又搞呢又搞路。
所以我今次決定用口語，寫篇快文。
話說早幾日有班細機，即係全架機得後面有兩個廁所，有位女士一上機放好行李就去廁所。唔知點解大家對於推開道廁所門都有啲障礙，我大力地幫佢推開之後講咗句：「記住鎖門啊！」當然，厠所門仲係顯示綠色，上面寫住Vacant，門並沒有鎖上。係呢個時候，有個女人諗都唔諗就好大力推開咗呢道門，大聲叫咗聲「哎呀！乜做乜唔鎖門㗎！」佢顯得好嬲，面都紅晒，仲嚇到扯蝦。我當堂呆咗，心諗，其實又唔使咁大反應嘅。
當然，去廁所唔鎖門嘅人有問題，但同樣地，我唔覺得門都唔識敲嘅女人又啱得晒。人遇到不如意事，總係諗到一萬樣嘢去鬧對方。我明，呢啲叫情緒。但情緒發洩完之後，停一停，諗一諗，其實自己都可能有錯，又或者自己都其實可以行多一步，預防唔開心嘅事發生。
只要多一個人識「由己及人」呢四個字，世界就會美好多一點點。
