【廣告人誌】專訪Schick 專頁抽水Post創作主腦

講到呢兩日風頭一時無兩嘅品牌，一定係 Schick 舒適 (HK) — 先出一個「被打的人根本唔係秋香！」post，加句「#皇天擊殺」，已經夠引人注目；再出一條神還原翻版AV片頭廣告嘅網片，更加引發網友瘋傳。好多行家都私訊問我：「知唔知邊間 agency 做？」為此，廣告狂人特別走訪 Schick 嘅 Social Media Agency — 年輪事務所嘅負責人KJ，由佢講解創作背後嘅想法。

Schick Facebook 抽水Post創作主腦：我想原創多過抽水！

提起 Schick ，之前比較有印象嘅po，係攞咗吳文遠一張「鬍鬚兀突」嘅相嚟玩，寸佢「不如你剃咗鬚先啦」。其實係咪特登抽呢啲敏感人物／議題嚟賺earn media ？「我哋主要係追求娛樂性，係咪同敏感議題有關，其實唔係我哋嘅concern。」KJ說，「識得留鬚，先要識剃，係我哋想帶出嘅訊息，所以我哋嗰陣時揀吳文遠，都係因為覺得佢留鬚唔太好睇啫。」

咁秋香個Post呢？好似同留唔留鬚冇乜關係喎。「我哋有啲Post會比較著重帶出Schick 係一個好玩得嘅品牌，其實同佢哋早前同《新世紀福音戰士》合作，惡搞碇司令形象嗰種幽默係同出一轍嘅。」

咁網友擊節讚賞嘅「神還原AV片頭廣告」，個構思係點嚟？「原先係想堅惡搞AV片嘅，不過傾傾下又諗到攞呢條逢睇AV必飛嘅廣告嚟玩。」唔覺得同AV有關唔係咁好咩？「我哋又唔覺喎，AV呢啲次文化其實係雅俗共賞，福山雅治都係AV迷啦。」咁都畀你兜到！

「我哋早有預謀，出完廣東話版後再推普通話原音版，果然後者反應更熱烈！而我哋為呢條片定落嘅 page like 增長目標，亦都已經達標。」KJ補充道。

雖然最近啲Post 反應好好，KJ卻不諱言：「講真，雖然香港網民好偏愛抽水，但我哋本身做開創作，始終想做原創多啲。希望下次你訪問我，係因為我嘅原創作品啦。」創作人有呢個諗法，絕對態度正確，我哋不妨拭目以待。