【夜遊人隨筆】香港夜總會你去過未？

【男士溫提：注意，《夜遊人隨筆》專欄，乃專欄作家以個人經驗及見解，分享昔日香港夜場文化的點滴，並非現有色情行業的廣告宣傳，僅作為本土另類學術文化紀錄及交流，好讓大家瞭解早已失傳、但曾非常輝煌的香港夜總會文化。簡單嚟講，AV seed、援交資料、ig女友情報等等，全部唔會有。】

以下內容，並不適合未成年的小朋友觀看。

香港夜總會行業式微，已經唔係呢一兩年既事，如今留返落黎既只剩低一D旺角級數既中、小型場，又或者一D以私竇形式經營既夜場，呢一代人真係再無乜機會可以感受乜野叫『銷金窩』，當然，你都可以話，返大陸咪有囉！仲有「花街選秀」添！但係始終，大陸點玩都好，其模式都係抄自香港既日式夜總會，而且，好多香港人既心態都係，始終俾得起一萬幾千以上玩一晚，打死都希望係「陀地」而唔係「北姑」，而且無論大陸攪成點都好，始終佢地既服務、招呼水平，係永遠及唔上香港水準。

可惜，尖東大場如今已經執得七七八八，即使你有錢都好，如果唔識人上私竇，你基本上再無辦法去感受香港以前果種夜場生活，而且私竇規模始終有限，氣派上同大場係完全兩回事。因此呢個專欄就應運而生，同大家分享下呢段已經逐漸被人遺忘既夜場歲月。

夜總會 到底點玩？大富豪算唔算尖東三大夜場？

97前既歲月可以講係夜場最風光既年代，當年鄧伯伯最出名既一句「馬照跑，舞照跳」，「跳舞」講緊既，就係夜總會，點解去夜總會會叫「跳舞」？因為日式夜總會前身係「舞廳」，當時d場個個坐大廳，而且真係有個舞池俾你同d小姐跳老舞，其實正式既日式夜總會人客都係坐大廳既，但聰明既香港人好快就諗同日式夜總會同卡拉OK結合經營，除左有間房可以俾大家同小姐唱下歌仔外，最重要係關埋門玩乜都得，而玩乜野就大家心照啦！於是，漸漸地，根本就唔會有人去夜總會真係跳舞，但業界仍然會去夜總會耍樂為「跳舞」稱呼之～

而跳舞，又會有分「茶舞」及「晚舞」兩種。唔講唔知，其實夜總會係早上十一點已經開始營業，返早段11:00至20:00稱之為「茶舞」，之後時間稱之為「晚舞」，兩個時段收費係唔一樣既，此乃後話。講返最興往時期，尖東既大場，真係多到數不勝數，除左人人都識就算未去過都知道既大富豪、中國城外，仲有同佢兩間齊名既大都會，合稱「尖東三大夜場」，仲有其他大場都好出名，包括有新花都、大皇宮、富都、富城、中國宮殿……每個場都各有特式，大家有無去過呢？下次繼續分享～

作者／蕉神
IT人，作家，Game友，飛車手，網台主持，旅行家，酒鬼，宅男，週身刀無張利，遊走於物慾的矛盾之間，總能保持一顆赤子之心看天下。