拍車男喺呢個星期都試駕了一些新車，不過基於各種原因未能夠寫車評。思前想後，不如就回帶寫下舊車，不過唔需要擔心，唔係寫幾個月前嘅車，雖然呢部車都出咗好耐，但無幾耐前佢喺香港出咗小改款，而且佢重要係一部電車。你估到？無錯喇，呢部係BMW i3。
BMWi3電能車香港可行嗎？
講BMW i3嘅原因，係想同大家探討下電能車喺香港嘅可行性。你可能會即刻問拍車男「喂阿哥，Tesla Model S通街都係啦，你重講乜嘢可行性？」啱，但大家有無諗過一個問題，Model S咁長的續航力嘅主因係咩。係，就係因為唔夠充電站同充電器，遲下又話會收錢，香港本來係一個非常適合推行電動車嘅地方，皆因地方細，密集，路程短，如果充電站規劃完善啲，政府支援好啲，電能車喺香港嘅未來簡直係一片光明。
但事實好可惜，整極都重未夠。BMWi3第一代的續航力只得130-160km，喺香港呢個充電站未普及嘅城市，點夠用？就咁返工放工都還可以，去遠啲地方，或者多幾個地點玩，你返屋企個程路都或者已經個心滴緊汗，擔心唔夠電。我一直有呢個疑問，帶去問車主，一問之下我就發現自己係幾咁天真。i3嘅車主原來比想像中多，佢哋答拍車男，i3嘅續航力的確係佢哋擔心嘅，亦有試過差啲就無電。但都繼續用，主因係屋企有得充電。睇到呢到，大家明嗎？好似外國家庭咁，家中有得充電先至係皇道！只有家中有得充電，問題其實唔係好大，而且佢哋一致認為續航力只要到200km左右就掂，唔需要好似Model S咁長，用Model S嘅都係因為屋企無得充電。喔！答得幾寸嘴，但又啱喎。
BMWi3實車試踩：靜得驚人！
小改款i3，外形同內櫳係零改動，真係其實改少少都唔怕啦，懶得佢哋呢。官方宣傳，最大嘅改動就係舊電池同續航力，提升了50%電池容量，續航能力由130km增至200km。呢個賣點相當之吸引，由機場去落馬州根據Google Maps大概41公里，即係最多可以來回四至五次，感覺非常唔錯。但若然屋企無得充電，下下去搵位充都煩。車內中控台會顯示就近嘅充電站，去停車場泊車又可以充電，但實在要時間同彩數，玩電能車，今時今日依然好似玩緊自己咁。
我試駕上大帽山，電能車的馬力爽快相信大家都好清楚。但問題亦係呢度，力太大，有時油門唔知用幾多力踏，而且太靜，成日都唔知著咗車未，我有幾次以為自己未著車，系統又會自動因為你唔開車而熄車，都幾煩。再者，太靜，途人都唔知你架車開車，其實重容易有危險。前轆用155/70 R19，尾轆用175/60 R19，係就係前窄後闊，但望落去都好幼，幼到有啲驚，轉彎都要刻意收到好慢，如果唔係驚反車，渣住佢實在要好有耐性，為咗慳電真係去得好盡。不過，BMW嘅操控同軚感實在出色，絕非Tesla扮Mercedes-Benz嘅假舒適可以相比。匹數170匹、250Nm扭力，比第一淡油時唔會有幾大嘅爆發力，好似平時嘅Turbo車咁，維持舒適嘅狀態。
車價$430,000起，電池保你8年，10萬公里，算係咁。但係，你問我買唔買得過的話，我依然都係答你，睇定啲先啦，反正出年個電能車稅務優惠，九成唔會繼續有，咁不妨等到2020年，多啲選擇，技術層面再好啲，充電器多啲先再算。香港地玩車，係活受罪，有得等，不如再等下。
拍車男下周預告：新到車cam 先實測後報告
P.S. 上周第一篇車評出街後，社長話我知反應好好，拍車男喺度先多謝咁多位讀者。我亦知道有讀者希望我講下車cam，放心，貨我已經借咗（有相有真相），但基於要最真實嘅測試，請大家比少少時間我試用下，先可以比個最好嘅評語。
